Dulliau

Defnyddir dulliau addysgu iaith llwyddiannus ac anffurfiol sy’n mynd law yn llaw â ffyrdd eraill o ddysgu’r iaith, e.e. cyrsiau CBAC, Wlpan ac ati. Mae ein cyrsiau ni yn atodol i gyrsiau darparwyr eraill ac maent yn gyfle gwych i ymarfer, adolygu a chynyddu hyder wrth siarad.

Mae’r cyrsiau yn rhoi cyfle i bobl ymarfer bob sgil ieithyddol – siarad, darllen, gwrando ac ysgrifennu – ond rhoddir pwyslais arbennig ar ddatblygu hyder i siarad yr iaith, drwy eich annog i fanteisio ar bob cyfle i ymarfer eich Cymraeg yn ystod eich cyfnod yn y Nant.

Mae ein tiwtoriaid profiadol yn gallu addasu rhywfaint ar gynnwys bob cwrs yn unol ag anghenion y grŵp, a chan na fyddwch chi byth mewn dosbarth o dros 15 o bobl byddwch yn siŵr o gael digon o sylw unigol. Gan fod pobl yn dod atom ni o bob cwr o Gymru a thu hwnt rhoddir sylw i Gymraeg y Gogledd a’r De a gwahaniaethau tafodieithol drwy gydol y cyrsiau.

Cliciwch yma ar gyfer y fersiwn Cymraeg o Lawlyfr y Dysgwyr:
Cliciwch yma ar gyfer y fersiwn Saesneg o Lawlyfr y Dysgwyr:



Cynhelir gwersi dwys bob bore a phrynhawn. Bydd amser yn cael ei neilltuo ar gyfer astudio personol a gweithgareddau iaith ac adloniant a fydd yn atgyfnerthu’r gwaith a wneir yn y dosbarth, ac yn adeiladu arno. Bydd un pnawn yn cael ei dreulio y tu allan i’r dosbarth yn y gymuned er mwyn rhoi cyfle i chi ymarfer eich Cymraeg mewn sefyllfaoedd go iawn. Wrth gwrs bydd digon o gyfle i chi gymdeithasu, ymlacio ac ymarfer gyda’ch cyd-fyfyrwyr.

Mae’r tudalennau nesaf yn nodi dyddiadau ein holl gyrsiau iaith yn ystod 2011, ynghyd ag amlinelliad o amcanion a ffwythiannau ieithyddol bob cwrs. Fodd bynnag mae’n bwysig sylweddoli y gall pob cwrs fod ychydig yn wahanol gan y bydd anghenion unigolion yn amrywio o gwrs i gwrs.

Wedi i chi gwblhau cwrs yn Nant Gwrtheyrn mae’n bwysig eich bod yn dal ati gyda’ch astudiaethau er mwyn datblygu eich sgiliau ieithyddol. Rydym yn hapus i gynnig sesiwn anffurfiol ar ddiwedd pob cwrs lle y gallwn awgrymu pa gamau fyddai’n addas i chi eu cymryd nesaf fel unigolyn.